आदिवासी मानव अधिकार सम्बन्धी अभिमुखीकरण सम्पन्न
लाहुर्निपद्वारा आयोजित तीन दिने आदिवासी मानव अधिकार सम्बन्धी अभिमुखीकरण भक्तपुरमा सम्पन्न भएको छ । पूर्व ईलामदेखि पश्चिम सुर्खेत सम्मको १३ जिल्लाका २२ जनाको सहभागीता रहेको सो कार्यक्रम २०७४ पौष २ देखि ४ गते सम्म सञ्चालन भएको हो ।
कार्यक्रममा आदिवासीको बारेमा आधारभूत ज्ञान, सामूहिक अधिकार र व्यक्तिगत अधिकार, मानवअधिकार, आईएलओ महासन्धि नं. १६९, आदिवासीहरुको अधिकार सम्बन्धी संयुक्त राष्ट्रसंघीय घोषणापत्रका बारेमा प्रशिक्षण दिइएको थियो । साथै व्यापार र मानवअधिकार सम्बन्धी संयुक्त राष्ट्रसंघीय निर्देशक सिद्घान्तहरु, आदिवासी महिला अधिकार, दस्तावेजीकरण, मानवअधिकार हनन्को उजुरी प्रकृयाका सम्बन्धमा पनि सहभागीहरुलाई प्रशिक्षित गरिएको थियो ।
स्थानीय स्तरमा काम गर्ने आदिवासीहरुको मानव अधिकार प्रतिरक्षक तयार गर्ने र उनीहरुलाई आफ्नो हक अधिकार तथा बहिष्करणमा पारिएको विषयलाई अभियानको रुपमा अगाडि बढाउन मानव स्रोत विकास गर्ने उद्देश्यले सो कार्यक्रम संचालन गरिएको हो ।
